Op 7 juli vond voor de vijfde keer het Twents Songfestival plaats. In het publiek zat ook nu weer onze ‘voormalige’ stadsdichter Freddy Mensink. Het publiek kon woorden aanleveren om de geboren Reutummer, maar inmiddels een bekende Siepel, inspiratie te geven om een gedicht over dit evenement te maken. De dikgedrukte woorden zijn door het publiek aangeleverd. Het resultaat is hieronder te lezen. Het is opnieuw een fantastische ode aan ons festival en onze Nedersaksische taal geworden. Leu, geniet er van.
A VIEF JOAR LEEDKES IN HET PLAT……..HEEL APART!
Ok a blas Oatmössche mangs iets te hoog van ’n toarn,
Het Twents songfestival is der annere joarn wa geboarn
Leedkes zingn in’t plat past Oatmössche merakels goad
Het städke gef zich doarmet ok Nedersaksisch bloot.
Want de zômmerdag is’t in de Siepelstad vaak völ a.b.n.
Toeristn keuert nig oawer ne kranke hen.
Die bint mear van “prachtig en heel bijzonder”
Van teumig zittn, zonder enig gedonder.
Die flaneart duur de ströatkes, mooi hènig an,
Zo van loat mer kuuln, goad te pas, aait verdan.
Koffie met krintnstoet op een terras
Of nen vernemstign borrel in’t glas.
Onnerwiel bie ’t Los Hoes…………
Achter de mooie Gasterie van het Othmar bier,
Pronkt het Losse Hoescomplex, krek en schier.
Goa der mèr an stoan….genne vrootnhoop te zeen,
Wa 500 mooie witte steulkes stoat parmantig in de been.
Zo teggn twee uur ’s merrags is alles bezet,
En kan Theo beginn’n met zien kuiergebed.
Schier in’t pak, met zien witte boezeroen achter ’n boksenboard,
Ongeleufelijk….wat kan den kearl onmeunig mooi van ’t woard.
Op ’t podium in de tusschertied vief topmuzikanten,
Nou wis en waarachtig, ok die wett’ van wanten.
En wat dach-ie van de jury, die tehoap majt stiggeln oawer ’t möjste leed
Ze zett’ zich schrap en doot ons later bescheet.
Dan barst ’t los, de earste vief leedkes…..prachtig!
Hier en doar wördt het wat leu a te machtig.
De wies, de teksten en Hans Barkel’s orkest,
Hoanervel en……ieders eegn geveul dot de rest.
Dan is’t pauze en een drankje brenk verzet,
Effn naffeln en nuiln met oale kunnighèd.
Onnerwiel stoat de volgende artiestn a te trappeln van ongeduld
En opniej völ applaus, menig hät wördt vervuld.
De jury ging in beroad en Jan Riesewijk gaf ons les,
O.a. in het vlöggeln: volgens hem polonaise oawer dwes.
Zienne grappn mangs oarig Lossers plat, of hek ’t mis?
Trouwens ik wus nig dat een strempeltoetn ne condoom is.
Toen kwam de jury met’n oetslag in de hand,
Ok ’n paar dröppel règen, ’t onneschoer hölp ons oet’n brand.
Wat was het spannend, wat was het apart,
Winnares: LOTTE AARNINK (was) KATS VAN’T RABAT.
Namens de organisatie glunnern ok Hans met het hiele gezicht,
Nich alleen um de winst van dat beste wicht.
“Wat nen gloepens mooin merrag” reup eigenlijk al man in koar,
“Hier ku’w met verdan”……tot tookn joar !
Freddy Mensink, 7 juli 2024
